C/weli Gaas: Wax Maamul ah oo Hiiraan ka Jira Ma Jirto, Hal Gobolna Maamul Goboleed Ma Noqdo

 

Muqdisho (RBC) Raysul wasaaraha xukuumada KMG Soomaaliya C/weli Maxamed Cali oo caawa dib ugu soo laabtay magaalada Muqdisho ka dib booqasho uu maanta ku tagay magaalada Beledweyne ayaa shaaca ka qaaday inuusan jirin wax maamul goboleed ah oo ay DKMG u aqoonsan tahay inuu ka jiro gobolka Hiiraan.

“Wax maamul ah oo aan u og nahay Hiraan ma jirto, hal gobolna ma noqdo maamul goboleed ee haddii la sameynayo maamul, sida ku qoran dastuurka waa inuu noqdaa labo iyo wixii ka badan” ayuu yiri raysul wasaaraha oo caawa wareysi siiyey BBC-da.

Raysul wasaaraha ayaa sheegay in maanta lagu soo dhoweeyay magaalada Beledweyne balse uusan la socon wax maamul ah oo la yiraahdo Dooxada Shabelle kaasoo uu madaxweyne ka yahay C/fataax Xasan Afrax oo raysul wasaaruhu maanta isku arkeen magaalada Beledweyne.

Wuxuu sheegay in dawlada dhexe aysan qorshaha ugu jirin inay maamul u dhisto gobolada dalka balse ay tahay in dadka deegaanadaasi ku nool ay soo sameystaan maamulo ay iyaga rabaan.

Joogitaanka ciidamada Ethiopia

Raysul wasaaraha DKMG waxaa la weydiiyey inay is arkeen saraakiisha Ethiopia ee ku sugan Beledweyne, wuxuuna yiri “Haa waan is aragnay waana wada hadalnay”.

RBC Radio