Ra’iisal wasaar Saacid oo Markii Ugu Horreysay Safar Waddanka Dibaddiisa Ugu Baxay

Ra’iisal wasaar Saacid oo Markii Ugu Horreysay Safar Waddanka Dibaddiisa Ugu Baxay by khaliil Muqdisho, Abril 03, 2013 (WDN)- Ra'iisal wasaaraha Jamhuuriyadda Federaalka Soomaaliya Mudane Cabdi Faarax Shirdoon “Saacid” oo toddobaaddadiii ugu dambeeyay socdaallo ku kala baxinayay gobollada dalka qaarkood, ayaa markii ugu horreysay tan iyo intii xilka loo magacaabay socdaal ugu kicitimay wadanka dibaddiisa. Ra'iisal wasaaraha yo wafdi uu hoggaaminayo, ayaa booqasho ku tagey  wadanka Jabuuti iyadoo garoonka diyaaradaha Jabuuti uu ku soo dhaweeyay ra'iisal  wasaaraha cusub ee wadankaas Md. C/qaadir Maxamed Kaamil iyo mas'uuliyiin kale oo ka mid ah xukuumadda Jabuuti. Md. Shirdoon, ayaa waxaa socdaalkiisa Jabuuti ku weheliya wasiirrada Difaaca ,  Arrimaha Gudaha iyo Amaanka Qaranka iyo madax kale oo ka tirsan dawladda. Ra'iisal wasaaraha iyo wafdigiisa ayaa la filayaa inta ay Jabuuti joogaan in ay kulamo la qaataan  madaxweynaha dalka Jabuuti Ismaaciil Cumar Geele iyo madaxda kale ee wadankaas. Dalka Jabuuti ayaa waxa uu ka mid ayahay waddamada Afrika ee ciiddamadu ka joogaan Soomaaliya. Haddaba Ra'iisal wasaare Saacid oo aan looga baran tan iyo intii uu xilka ra'iisal wassaranimo uu u magacaabay 6dii bishii Okotober ee sanadkii 2012 madaxweyne Xasan Sheekh Maxamuud ayaan la ogeyn sababta xilligan keentay in uu dibaddda safar ugu baxo. Ra'iisal wasaaraha, ayaa had iyo jeer lagu dhaliilaa in awooddiisii dastuuriga ahayd uu maroorsaday madaxweyne Xasan oo isagu tan iyo intii xilka loo doortay inta badan safarro dibadda ah waqtigiisa ku qaata. WardheerNews, Muqdisho