Ciidamada Amisom oo Kala Ceyriyey Maleeshiyaad Isbaarooyin Dhigtay Wadada U Dhexeysa Afgooye iyo Marka

Afgooye (RBC) Ciidamada Amisom oo wata gaadiidka dagaalka ayaa maanta si awood ah ku kala ceyriyey kooxo maleeshiyaad ah oo si bilqan ah u dhigtay isbaarooyin ay baabuurta kala guranayeen lacag baad ah inta u dhexeysa degmooyinka Afgooye iyo Marka ee gobolka Shabeelaha Hoose.

Hawlgalkan ay saaka qaadeen ciidamada Amisom ayaa ka dambeeyay cabasho maalmihii la soo dhaafay ka soo yeereysay dadka ku nool deegaanada gobolka Shabeelaha Hoose iyo gaadiidleyda ka shaqeysa wadada Afgooye iyo Marka isku xirta oo baabuurta ay ka go’een beryihii la soo dhaafay isbaarooyinka dartood.

Gudoomiyaha gobolka Shabeelaha Hoose C/qaadir Maxamed Nuur ayaa maanta ka qeybgalay hawlgalka ay Amisom ku qaaday isbaarooyinka yaallay wadada Afgooye iyo Marka u dhexeysa, halkaasi laga qaaday in ka badan 10 jidgooyo oo ay dhigteen maleeshiyaad ka tirsan ciidamada dawlada oo dhamaantood ku lebisan dharka tuutaha.

Qaar ka mid ah gaadiidleyda ka shaqeysa wadada u dhexeysa Marka iyo Afgooye ayaa maanta sheegay inay aad ugu faraxsan yihiin kooxaha maleeshiyaadka ee wadada lagaceyriyet, waxayna gaadiidleyda sheegeen inay dib u bilaabi doonaan shaqadooda oo ay markii hore u joojiyeen lacago xad dhaaf ah oo maleeshiyaadka si qasab ah kaga guran jireen gaadiidka wadada isticmaala.

Ma jirto wax war ah oo ka soo baxay taliska Amisom oo ku aadan hawlgalkan ka dhanka ah isbaarooleyda ee ay maanta fuliyeen.

Dhanka kale waxay cabsho weyn ka soo yeereysaa gaadiidleyda ka shaqeysa inta u dhexeysa Muqdisho iyo Afgooye oo maanta oo kaliya la soo sheegayo in ka badan shan isbaaro la soo dhigay wadadaasi.

RBC Radio