Ciidamada Burundi oo la xaqiijiyay in 70-askari looga dilay dagaalkii bishii hore ka dhacay Degmada Dayniile

Sabti, November 26, 2011 (HOL) − Qaar ka mid ah askartii ciidamada Burundi ee ku dhaawacmay dagaalkii ay Al-shabaab kula galeen degmada Dayniile ee magaalada Muqdisho 20-kii bishii Oktoobar ee lasoo dhaafay ayaa sheegay in 70-askartooda ah lagu dilay dagaalkaas, tiro intaas ka badanna looga dhaawacay.
Daqiiqado kaddib markii uu dhacay dagaalkaas ayay Xarakada Al-shabaab waxay kusoo bandhigeen deegaanka Calamada ee duleedka Muqdisho maydadka askar ay tiradooda ku sheegeen 76-askari oo ka tirsan ciidamada Burundi, balse waxaa isla markiiba hadalkaas beeniyay ururka Midowga Afrika oo sheegay in laga dilay 10-askari, laba askari oo kalena ay maqan yihiin.
"Wuxuu dagaalku ku billowday si sahlan, oo aad u sahlan," ayuu yiri Arcade Arakaza oo ka mid ah askartii ciidamada Burundi ee ku dhaawacmay dagaalkii Dayniile isagoo jiifa isbitaal ku yaalla Nairobi.
Sarkaalkan oo u warramayay wargeyska The New York Times ee kasoo baxa dalka Mareykanka ayaa sheegay in 70-askartooda ka mid ah uu hubo inay dagaalka ku dhinteen, halka tiro kale oo badanna ay ku dhaawacmeen.
"Deegaanku waa mid yar, xoogaggii Xarakada Al-shabaab waxay bilaabeen inay ka baxaan goobta. Waxaan u tagtay dad dhoolla-caddeynaya oo dhahaya erayo ay ka mid yihiin - Ha walwalin Shabaab way u dhammaantay," ayuu yiri Arakaza.
"Laakiin, waxyar kaddib waxaa meel walba kasoo dhacay rasaasta qoryaha daran-doorriga u dhaca, haweenka, caruurta iyo cid walba waxay rasaasta u soo fureen dhinaceenna xitaa waxaa nagu soo dhacay sawaariiq," ayuu sarkaalku hadalkiisa ku daray. "Waxay ahayd arrin la yaab leh, waayo dagaalyahannada Al-shabaab waxay naga xireen dariiq walba, wax walba oo ay haysteenna way nagu fureen."
Maydadka askartii lagu dilay dagaalkaas ayaa waxay intooda badan gacanta ugu jiraan Xarakada Al-shabaab, waxaana dagaalkii Dayniile ka dhacay uu noqonayaa kii uu khasaarihii ugu badnaa kasoo gaaray ciidamada AMISOM tan iyo markii ay howl-galkooda ka billlaabeen Muqdisho.
Saraakiil ka tirsan ciidamada Midowga Afrika ayaa sheegay in 500-askari oo ka kala socda dalalka Burundi iyo Uganda looga dilay Muqdisho afartii sano ee ay howlgalka ka wadeen Soomaaliya, iyagoo sheegay in askartii ugu badnaa laga dilay wixii ka dambeeyay sannadkii 2009 oo ay Itoobiya ciidamadeeda kala baxday Soomaaliya.
Askari kale oo ka mid ah ciidamada Burundi ee dagaalkii Dayniie ka qaygalay oo lagu magcaabo, Astere Nimbona ayaa isaguna sheegay inay dagaalamayeen sagaal saacadood oo xiriir ah illaa ay ka rasaastii ka idlaatay.
"Wixii nagu waxay u ekaayeen ismiidaamin," ayuu yiri Nimbona. Iyadoo hadallada ay warbaahinta siiyeen saraakiishan u dhashay dalka Burundi ay kusoo beegmayaa iyadoo dowladda Burundi aysan weli si rasmi ah u shaacin tirada askartii uga dhintay dagaalkii ugu dambeeyay ee ay Dayniile kula galeen Xarakada Al-shabaab.
Degmada Dayniile oo ka mid ahayd goobaha ay awoodda badan ku lahayd Al-shabaab ayaa waxaa weli inteeda badan gacanta ku haya Al-shabaab, inkastoo ay ciidamada Midowga Afrika iyo kuwa dowladda KMG ah ay qaybo ka mid ah ku sugan yihiin.
Maxamed Xaaji Xuseen, Hiiraan Online