Gaalkacyo (RBC Radio) Maxkamadda ciidamada qalabka sida ee Puntland ayaa billowday Isniintii toddobadkii hore maxkamadeynta maxaabis al-Shabaab ah oo lugu qabtay dagaalladii bishii Maarso ka dhacay deegaannada xeebta ku yaalla ee gobollada Mudug iyo Nugaal,marka oo dagaal-yahanno lugu qiyaasay 500 ay weerar ku soo qaaden deegaannada Puntland.
Puntland ayaa guul ka gaartay dagaalka ay soo qaaden dagaallamayaasha al-Shabaab oo laga qabtay maxaabis gaaraya boqollaal,walow ay u badnaayeen dhallinyaro da’yar ah.
Xeer Ilaaliyaha guud ee Puntland, Maxamuud Xassan Aw Cismaan ayaa u sheegay warbaahinta in maxaabista la soo qabtay ay tiro ahaan gaarayaan 98 dagaal-yahan oo isagu jira carruur iyo rag waa weyn,waxuuna sheegay xilligan inay maxkamadeyn u billaabatay dagaal-yahannada dagaalka lugu soo qabtay kuwooda qaan-gaaray oo tiro ahaa gaaraya 45-maxbuud.
“Maxkamadeynta waxay u billaabatay 45 maxbuus oo dhammantod ah kuwa qaangaaray,”ayuu yiri xeer ilaaliyaha guud ee Puntland.
Madaxweynaha Puntland,Cabdiweli Maxamed Cali (Gaas) oo Arbacadii shalay khudbad ka jeediyay furitaanka kalfadhigii 37-aad ee baarlamaanka,waxuu sheegay guusha ugu weyn ee ammaanka laga gaaray inay tahay dagaalka ay soo qaaden boqollaal dagaal-yahan oo ka tirsan al-Shabaab,kuwaaso badi la dilay,la soo qabtay,tiro yarna ay baxsadeen.
Dagaalka ka dhacay bishii Maarso,waxuu ahaa duulaankii ugu horreeyay oo si toos ah usoo qaadan ururka al-Shabaab oo ku xooggan koonfurta iyo bartaha Soomaaliya.
__
RBC Radio
__
RBC Radio
No comments:
Post a Comment