Al-Shabaab oo deegaanada loo barakacay iyo Afgooye ka mamnuucay ka ganacsiga Sambuuska (Warbixin)

Xarakada Al-Shabaab ayaa deegaanada loo barakacay iyo degmada Afgooye ee Gobolka Shabellaha Hoose ka soo saaray awaamiir ay ku mamnuuceen ka ganacsiga Sambuuska, iyadoo la faray Ganacsatada Biibitooyinka leh in aanay ka ganacsan karin.

Gawaari cod baahiyeyaal ah oo lagu rakibay ayaa lagu farayay dadka in la mamnuucay Sambuuska oo ah raashin fudud ee Soomaalida aad u jecel yihiin, waxaana si dhab ah loo ogeyn sababaha ka dambeeya in la mamnuuco.

Wararka ayaa sheegaya in Qeybta faya-dhowrka Shabaabka ay ka soo saareen in Sambuuska uu qeyb ka noqday cuduro maalmahan ku soo laabtay deegaanada qaar, gaar ahaan cudurka xanuun caloolaha loo yaqaano.

Sidoo kale warar qaar ayaa sheegaya in Shabaabka ay ku mamnuuceen Sambuuska inuu yahay mid leh calaamada Kirishtada, maadaama sambuuska yahay mid saddex geesood ah.

Dad fara badan oo dan yar ah ayaa iibinta Sambuuska iyo waxyaabaha kale ee loo yaqaano (Qamshax-qamshaxa) sida Burka, Sambuuska, Bajiyaha iyo mac-macaanka kale waxay ku dabirtaan nolol maalmeedkooda, hase ahaatee waxay tani caqabad ku tahay dadkaas oo wadooyinka ku wareejiya.

Mamnuucida ay Shabaabka deegaanadaas ku soo rogeen Sambuuska ayaa ku soo beegmeysa xilli ay fooda nagu soo heyso Bisha Ramadaan, dadkana ay waxyaabaha ku anfuraan ka mid yahay Sambuuska.