Faah faahin Wasiiradii Haweenka loo magacaabay oo Saldhiga degmada Balcad ku xiran iyo wararkii ugu dambeeyay

Warar iska soo daba dhacayay ilaa duhurnimadii maanta, qaar ka mid ah Warbaahintana ay si kala duwan uga hadleen oo ahaa in Al-Shabaab ay qabsadeen ama afduubteen Wasiiradii Haweenka iyo Arrimaha Qoyska ee xalay xilkaas loo magacaabay Marwo Caasho Cismaan Caqiil ayaa wararka soo gaaraya Shabakada Jowhar.com yihiin kuwo arrimahaas ka duwan.

Warar isku dhow oo aanu heleyno ayaa sheegaya in Marwo Caasho Cismaan Caqiil xilka loo magacaabay ka war heshay saaka, isla markaana ay horay ugu diiday soo jeedin iyo dalab ku aadanaa in xilkaas loo magacaabay oo shaqsiyaad kala duwan ay u wadeen.

Hase ahaatee Marwo Caasho oo mudooyinkan ku sugneyd degmada Balcad ee Gobolka Shabellaha Dhexe ayaa saaka tagtay Saldhiga degmada ee ay gacanta ku heyso Al-Shabaab, iyadoo ku wargelisay in aysan xilkaas ka war heyn, wax shaqo ahna ku laheyn.

Qaar ka mid ah Ehelada Marwo Caasho oo ay la xiriirtay Shabakada Jowhar.com ayaa beeniyay in la afduubtay amaba iyadoo gaari u soo saarneyd Magaalada Muqdisho ay qabsadeen Shabaab, waxayna sheegeen in Shabaabka xataa aanay ka war heyn xilka loo magacaabay iyo shaqsiyadeedaba.

Marwo Caasho ayaa markii ay tagtay Saldhiga degmada Balcad ay ku ogeysiisay in xilkaas aanay iyadu raali ka aheyn, isla markaana magaceeda kaliya ka maqashay Warbaahinta.

Intaas kadib ayaa la sheegay in Ciidankii Shabaab ee ku sugnaa Saldhiga ay u sheegeen in Saldhiga ku sii negaato tan iyo inta laga baarayo arrinta.

Qoysaska Haweeneydan haatan gacanta ugu jirta Shabaab ayaa lama filaan ku noqotay xilka Dowladda ay u magacowday, iyagoo tilmaamay in aanay horay lagu soo wargelin ama lala socodsiin, waxaana ay sheegeen in aanay xilligan diyaar u aheyn inay ka mid ahaadaan siyaasada dalka.

Waxaa ay rajo ka muujiyeen in la sii deyn doono oo aanay wax dambi ah aanay gelin sida ay inoo xaqiijiyeen qaar ka mid ah Ehelada Marwo Caasho.

Caasho Cismaan Caqiil oo uu dhalay Gudoomiyihii hore degmada Jowhar Cismaan Caqiil ayaa ka mid aheyd xubnaha Golaha wasiirada loo magacaabay, waxaana ay tahay gabar aqoonyahanad ah oo baratay Cilmiga dhaqaalaha, isla markaana ka baxday Jaamacadii Lafoole.