Meydadka dhalinyaro gowracan oo saaka lagu arkay Xaafado ka tirsan degmooyinka Gobolka Banaadir

Meydadka ilaa afar ruux oo saddex ka mid ah ay gowracan yihiin ayaa saaka waabarigii lagu arkay xaafado ka tirsan Gobolka Banaadir, iyadoo dadka deegaanka ay ku soo tooseen madax go'an iyo qaarkii kale ee jirka oo is ag-yaala, kaasoo ay naxdiin iyo anfariir ka qaadeen.

Saddex ka mid ah Meydadkaas ayaa saaka waxaa lagu arkay Xaafada Barwaaqo ee degmada Dayniile, labo ka mid ah rasaas ayaa ka muuqatay, waana ay gowracanaayeen, halka midka kale ay rasaas kaga taalay madaxa sida dadka deegaanka ay inoo xaqiijiyeen.

Meydadka lagu arkay Xaafada Dayniile ayay dadka deegaanka sheegeen in aanay garaneyn, isla markaana aheyn dadka deegaanka, hase ahaatee markii ay cabaar ay goobtaas yaaleen, waxaa soo gaaray Ciidamo ka tirsan Al-Shabaab oo gaari ku qaaday.

Sidoo kale Meyd isna aan la garan ayaa saaka lagu arkay xaafada Suuqa Xoolaha ee degmada Huriwaa, kaasoo sida la sheegay qoorta ka go'anaa, waxaana dadka deegaanka ay sheegene in aanay garaneyn cida halkaas soo dhigtay.

Wararka qaar ayaa sheegaya in Meydka saaka lagu arkay Xaafada Suuqa Xoolaha uu ahaa askarigii shalay ay soo bandhigeen Ciidamada Dowladda KMG ka tirsanaa, kaasoo ay dagaal ku qabteen.

Meydadka wadareedka ee saaka lagu arkay xaafadaha aanay wali gaarin Ciidamada Dowladda KMG iyo kuwa AMISOM ayaa ku soo beegmaya xilli shalay dagaalo culus ay ka dhaceen Magaalada, kaasoo Ciidamada Dowladda kula wareegeen goobo hor leh.

Al-Shabaab ayaa shalay gelinkii dambe ku soo bandhigay agagaarka warshadii baastada nin ka tirsan Ciidamada Dowladda oo ay ku qabteen dagaalka.